အိမ်တစ်အိမ်လို့ ဆိုလိုက်တာနဲ့ ကျမတို့ မျက်စေ့ထဲမှာ အရင်ဆုံး ပြေးမြင်မိတာက လုံခြုံပြီး ခိုင်ခန့်နေတဲ့ အဆောက်အဦး တခုဘဲ ဖြစ်နေပါလိမ့်မယ်ရှင်။
တဆက်ထဲမှာဘဲ အဲဒီအိမ်ကြီးထဲမှာ နေထိုင်ကြတဲ့ မိသားစုဝင်တွေရယ် သူတို့နဲ့ဆက်နွယ်နေတဲ့ သက်ရှိသက်မဲ့ ရုပ်ဝတ္ထု ပစ္စည်းတွေ သူတို့နဲ့ ပါတ်သက်တဲ့ စီးပွားရေး လူမှုရေး ပညာရေးတို့နဲ့အတူ သူတို့ရဲ့ အလုပ်အကိုင်တွေကိုပါ စိတ်ဓါတ်ရေးရာတွေကိုပါ တပါထဲ မြင်ယောင်လာရမှာ ဖြစ်ပါတယ်။
တဖန် အဲဒီအိမ်ကြီးထဲမှာမှ ပါတ်သက်ဆက်နွယ် လာကြတဲ့ သက်ရှိလူသားတွေ သတ္တဝါတွေ အသင်းအဖွဲ့တွေ အုပ်စုတွေ မိသားစုတွေရယ်ဆိုပြီး အများစုက တစုတစည်းထဲ နေတတ်ကြတတ်ကြတဲ့ နေချင်စဖွယ်အတိနဲ့ ဖြစ်တည်ခဲ့တဲ့ အိမ်ဆိုတဲ့ နေရာလေးတွေရယ်ဆိုပြီး ရှိလာတတ်ကြပြန်ပါတယ်။
ထိုအတိုင်းပါဘဲ ထိုအိမ်နဲ့အတူ အိမ်ရဲ့အနီးအနားမှာ ပါတ်ဝန်းကျင်ဆိုတာက ကပ်ပါလို့ နေကြပြန်သလို ထိုအိမ်ထဲက လူသားတွေနဲ့ ဆက်နွယ်လာမဲ့ ပါတ်ဝန်းကျင် ဆိုတာကလည်း အရေးကြီးလို့ နေပြန်ပါတယ်။
အိမ်တအိမ်ကို အပြင်ပန်းက ကြည့်လိုက်တာနဲ့ ထိုအိမ်မှာ အလိုအပ်ဆုံးဖြစ်တဲ့ ဝင်ဝင်ချင်း အိမ်ကြီးကို လုံခြုံအောင် အရင်ဆုံး အကာအကွယ်ပေးနိူင်မဲ့ ခြံစည်းရိုးဆိုတာ ရှိရပါမယ်။
ခြံစည်းရိုး မရှိတဲ့အိမ်ဟာ ဘေးသူစိမ်းတွေ ဝင်ချင်တိုင်းဝင်ပြီး ထွက်ချင်တိုင်းထွက်နိူင်ပြီး အကွတ်မရှိတဲ့တောင်း ပရမ်းပတာ ဖြစ်နိူင်တဲ့အတွက် ဒီအိမ်ကြီးဟာ ရည်ရှည်ခိုင်ခန့်ဖို့ မလွယ်နိူင်ပါဘူး။
ဒီနေရာမှာ အိမ်တအိမ်ရဲ့ ခြံစည်းရိုးကို တိုက်ရိုက်သက်ဆိုင်သူကတော့ အိမ်တအိမ်ရဲ့ အိမ်ထောင်ဦးစီးပါဘဲ အိမ်ထောင်ဦးစီး တယောက်ဟာ မိသားစု တခုလုံးအတွက် အရမ်းကို ခိုင်ခန့်တဲ့ အုတ်တတိုင်းပမာ ခြံစည်းရိုကြီး ဖြစ်နေရပါလိမ့်မယ်။
အိမ်ထောင်ဦးစီး ကာရံပေးထားတဲ့ ခြံစည်းရိုးကြီး ခိုင်ခန့်လေလေ စည်းရိုးအတွင်းက အိမ်ကြီးနဲ့အတူ အိမ်ကြီးကို မှီတင်းနေထိုင်ကြတဲ့ မိသားစုတွေဟာလဲ အစည်းပြေဖို့ ခက်ခဲလေလေပါဘဲ ဒါကတော့ အိမ်တအိမ်မှာ ရှိသင့်ရှိသင့် ရှိထိုက်တဲ့ ပထမ အရေးကြီးဆုံး အချက်တခုဆိုရင်လဲ မမှားပါဘူးရှင်။
ပြီးပြန်တော့ အိမ်မကြီးရဲ့ တံခါးတွေနဲ့အတူ တံခါးပေါက် အားလုံးဟာ လုံခြုံနေရပါမယ် ဒါမှလဲ အိမ်ထဲမှာ နေထိုင်ကြတဲ့ မိသားစုတွေအတွက် အဆင့်ဆင့် လုံခြုံမှုကို အပြည့်အဝ ပေးနိူင်ကြမှာပါ။
ဒီနေရာမှာတော့ မိသားတစ်စုရဲ့ အခန်းကဏ္ဍ တရပ်အနေနဲ့ စီးတဲ့ရေကို ဆယ်တဲ့ကန်သင်းလို့ ခေါ်တဲ့ အိမ်ထောင်ရှင်မက မလွဲမသွေ တာဝန်တွေကို ခွဲဝေပြီး ယူနိူင်ရပါမယ်။
အိမ်ဦးသခင်က ရှာသမျှကို မိသားစုအရေး ကျန်းမာရေး စားဝတ်နေရေး လှူရေးတန်းရေး လူမှုရေးတွေကို ဘက်စုံထောင့်စုံအောင် စီမံနိူင်သလို ထိမ်းသိမ်းနိူင်ကာမှ အိမ်ရဲ့တံခါးတွေ လုံခြုံအောင် စောင့်ရှောက်နိူင်မှာ ဖြစ်ပါတယ်။
အိမ်တအိမ်မှာ တအိမ်လုံးကို ရာသီဥတုဒဏ် မိုးဒဏ်လေဒဏ်တွေကို အကာအကွယ်ပေးနိူင်မဲ့ ခေါင်မိုးနဲ့ အကာတွေကို တောင့်တောင့်ခံနိူင်ဖို့ရာ ဒိုင်းနဲ့ယက်မ အဖြစ်ကတော့ မိဘ၂ပါးပါဘဲ အိမ်ခေါင်နဲ့ အိမ်ရဲ့အမိုးအကာတွေသာ လုံနေလို့ကတော့ မိသားတစုရဲ့ ဘဝတွေဟာ အလိုလိုကိုဘဲ လုံခြုံပြီးသား ဖြစ်နေကြပါလိမ့်မယ်။
နောက်ပိုင်းမှာတော့ ထိုအိမ်ကြီးထဲက မိသားစု အခန်းဏ္ဍတွေက ပါလာခဲ့ပါပြီ တစ်မိုးအောက်ထဲမှာ အတူနေကြတဲ့ သူတွေဟာ ဒီအိမ်ကြီး ရည်ရှည်ခိုင်ခန့်ဖို့အတွက် မဖြစ်မနေ တာဝန်ခွဲဝေပြီး ထမ်းရွက်သင့်ပါတယ်။
ကျမတို့ မြန်မာလူမျိုးတွေမှာ ဆိုရိုးစကားလေးတွေ ရှိပါတယ် အကိုကြီးတော့ အဖရာ အမကြီးတော့ အမိရာတဲ့ အုပ်ထိမ်းသူတွေက အပြင်မှာ စားဝတ်နေရေးအတွက် စီးပွားရှာနေချိန်မှာ သားသမီး အကြီးတွေက မိသားစုတာဝန်ကို တဖက်တလမ်းက တာဝန်ယူကာ ထမ်းဆောင်ပေးရပါမယ်။
အကိုကြီးတော့ အဖရာ ဆိုသလိုပါဘဲ အိမ်တအိမ်မှာ အဖေနဲ့အမေတို့ရဲ့ အားအထားရဆုံးကတော့ သားသမီး အကြီးဆုံးတွေပါဘဲ။
မိဘတွေ အိုမင်းလာတဲ့အခါ ထိုအိမ်ကြီးကို ဆက်လက်စောင့်ထိမ်းဖို့ရာ အကိုကြီးတွှော အဘအရာဆိုတဲ့ သားကြီးသြရသတွေက အလိုက်တသိနဲ့ လက်ဆင့်ကမ်း တာဝန်ယူကာ စောင့်ရှောက်ပေးရမှာ အေကန်အမှန်ပါဘဲ။
ထိုကဲ့သို့ပါဘဲ သမီးကြီး ရှိတဲ့ အိမ်တအိမ်မှာလဲ အမကြီးတော့ အမိရာဆိုသလိုပါဘဲ မိဘတွေ အိုမင်းမစွမ်းတော့တဲ့အခါ အမကြီးက မိဘအရိုက်အရာတွေ တာဝန်တွေကို မလွဲမသွေ ယူပေးရပါမယ်။
မိသားစုဝင်တွေရယ်လို့ ဖြစ်လာခဲ့ရင် ကြီးသူကိုရိုသေ ငယ်သူကိုလေးစားဆိုတဲ့ ဥပမာလေး တခုကိုလဲ လိုက်နာကြရပါမယ် သို့မှသာ ထိုမိသားစုဝင်တွေထဲက ငယ်ရွယ်သူတွေကလဲ ဆင့်ကဲနာခံတတ်မှုဆိုတာ ရှိလာကြမှာပါ။
အသက်အရွယ် ကြီးတဲ့သူကလဲ ကိုယ့်ဂုဏ် ကိုယ့်သိက္ခာနဲ့ နေနိူင်တဲ့သူတယောက် ဖြစ်အောင် ကြိုးစားဖို့လိုသလို ကိုယ့်ထက် အသက်အရွယ် ငယ်ရွယ်သူကို သနားကြင်နာတတ်သူလဲ ဖြစ်ရပါမယ်။
အသက်အရွယ် ငယ်ရွယ်တဲ့သူကလဲ ကိုယ့်ထက် အသက်အရွယ် ကြီးသူကို ချစ်ကြောက်ရိုသေတတ်ပြီး တလေးတစား ဆက်ဆံတတ်ရပါမယ်။
ထိုနည်း၎င်းပါဘဲ ကမ္ဘာကြီးပေါ်မှာ ရေတွေမြေတွေလေတွေကလဲ ဆက်စပ်နေကြပြန်ပါတယ် တနေရာနဲ့တနေရာ ကူးသန်းသွားလာနိူင်ကြမဲ့ သွားလာရေးအတွက် ခရီးသွား ဆက်သွယ်ရေး ကဏ္ဍတွေကလဲ ပါရှိလာခဲ့ပြန်ပါတယ်။
လူသားတွေရဲ့ အကျိုးစီးပွားအတွက် စီးပွားကူးသန်းဖို့ရာကလဲ အဓိက နေရာကနေ ပါဝင်နေကြသလို တစ်နိူင်ငံနဲ့တစ်နိူင်ငံ ခေတ်မှီတိုးတက်တဲ့ စက်မှုလက်မှု အတတ်ပညာတွေ ဖလှယ်ဖို့ကလဲ အိမ်ကြီးထဲက လူသားတွေရဲ့ တာဝန်တရပ် ဖြစ်လို့နေပြန်ပါတယ်။
ထိုနည်းကဲ့သို့ပါဘဲ သက်ရှိသတ္တဝါ အားလုံးအတွက် ကျန်းမာခြင်းသည် လာဒ်ကြီးတစ်ပါး ဆိုတဲ့အတိုင်း ကျန်းမာရေးဆိုတဲ့ အခန်းကဏ္ဌကလဲ အရေးကြီးတဲ့ ကဏ္ဌတခုအဖြစ် ပါဝင်လို့ နေပြန်ပါသေးတယ်။
အားလုံးသော သက်ရှိလူသားတွေဟာ အသိပညာတွေ ဗဟုသုတတွေ ဖလှယ်တတ်လာကြသလို စီးပွားကူးသန်းတဲ့ ကဏ္ဍတွေမှာလဲ ပါဝင်လာခဲ့ကြပြန်ပါတယ်။
ထိုပုံစံအတိုင်းပါဘဲ ကျမတို့နေထိုင်ကြတဲ့ ကမ္ဘာကြီးဟာလဲ လူမျိုးပေါင်းစုံ ဘာသာပေါင်းစုံ စုပေါင်းလို့နေထိုင်ကြတဲ့ အိမ်ကြီး တလုံးလိုပါဘဲ။
အသိပညာရှင် အတတ်ပညာရှင်တွေ ပညာရှိသူ ပညာမဲ့သူတွေ စုပေါင်းနေထိုင်ကြပြီး ဆိုးခြင်းကောင်းခြင်းတွေကို ရင်ဆိုင်ဖြေရှင်းနေကြရတာလဲ အားလုံးအမြင်ပါဘဲရှင်။
ထိုထိုသော အချက်တွေကြောင့် အခန်းကဏ္ဌတိုင်းကို ငြိမ်းချမ်းစွာ ဖြေရှင်းနိူင်မဲ့ ခေါင်းဆောင်ဆိုတဲ့ အုပ်ထိမ်းသူဆိုတာ နေရာတိုင်းမှာ ရှိနေရမှာ အေကန်အမှန်ပါဘဲရှင်။
ထိုပုံစံ အတိုင်းပါဘဲ သက်ဆိုင်ရာ နိူင်ငံတစ်နိူင်ငံမှာလဲ နိူင်ငံသူ နိူင်ငံသားတွေ လေးစားအားကိုးရတဲ့ ခေါင်းဆောင်ဆိုတာ မလွှဲမသွေ ရှိနေကြရမှာ ဖြစ်ပါတယ်။
ထိုနည်းလည်းကောင်းပါဘဲ နိူင်ငံတစ်နိူင်ငံမှာ ခေါင်းဆောင်ကောင်း တယောက်ကသာ အုပ်ချုပ်နိူင်မယ် ဆိုရင်တော့ ပြည်သူပြည်သားတွေအပေါ် ကျရောက်လာမဲ့ အန္တရာယ်တွေလဲ နဲပါးလာကြပြီး အရေးကြီးက သွေးစည်းလို့ လာကြမည် ဖြစ်ပါတယ်။
ကျမတို့မိသားစုလေးမှာ သားအမိသားအဖ လေးယောက်ရှိပါတယ် တယောက်နဲ့တယောက် ချစ်ကြောက်ရိုသေဆိုတဲ့ ဆောင်ပုဒ်လေးကို လက်ကိုင်ထားကာ နွေးထွေးတဲ့ မိသားစုလေးအဖြစ်နဲ့ ထိုထိုသော အိမ်လေးထဲမှာ နေထိုင်ခဲ့ကြပါတယ်။
အိမ်ရဲ့တတိုင်းကြီးဖြစ်တဲ့ အဖေက မိသားစုအပေါ် သူ့တာဝန်သူ ကျေပြွန်ပြီး လစ်ဟာမှုမရှိအောင် ထမ်းရွက်ပေးနိူင်သလို အဓိကကျတဲ့ မိသားစု စားဝတ်နေရေး ပညာရေး ကျန်းမာရေး အစရှိသည်တို့ကို ပြည့်ပြည့်စုံစုံ ဖြည့်စည်းပေးတတ်တဲ့ တာဝန်ကျေလွန်းသူ တယောက်ပါ။
သားနဲ့သမီးတို့ရဲ့ ပညာရေးအတွက် ဘာလိုချင်တယ် ဘာလုပ်ချင်တယ်လို့ ပြောလိုက်တာနဲ့ မဆိုင်းမတွ ဖြည့်စည်းပေးတတ်သူ တယောက်ဖြစ်သလို ကျန်းမာရေးနဲ့ပါတ်သက်လို့ အကြံဥာဏ်များ တောင်းခံလာရင်လဲ စိတ်ရှည်လက်ရှည် ရှင်းပြပေးတတ်သူမို့ မိသားစုရဲ့ အလေးအထားရဆုံး ဖခင်ကောင်းပါ။
အမေဖြစ်တဲ့ ကျမကတော့ အိမ်အတွင်းက အိမ်ထောင့်တာဝန်များ မိသားစုအရေး လူမှုရေး ကလေးတွေရဲ့ပညာရေးတွေကို တဖက်တလမ်းကနေ ကိုယ်တတ်စွမ်းသလောက် ကူညီပေးတတ်ပြီး အချိန်ရရင် ရသလို တစ်ဖက်တလမ်းကနေ ဟင်းချက်နည်း မုန့်လုပ်နည်းများကို mmlazp.blogspot.com နဲ့ စာတိုပေစလေးတွေ ရေးတတ်တဲ့ tuumar.blogspot.com ဆိုတဲ့ blog လေးတွေဖွင့်ကာ ဝေငှပေးနေသူ တယောက်လဲ ဖြစ်ပါတယ်။
တဖန် မိသားစုအတွက် နေ့စဉ်ထမင်းဝိုင်းပေါ်က အစားအသောက်များကို ကျန်းမာရေးနဲ့ ညီညွတ်စွာ စားသောက်နိူင်ရန်အတွက် ချက်ပြုပ်ပြင်ဆင်ပေးရတဲ့ မိခင်စားဖိုမှူး တယောက်လဲ ဖြစ်သလို မိသားစု မီးဖိုဆောင်လေးကို မင်းမူနေတဲ့ ဘုရင်မတယောက်ဆိုလဲ မမှားပါဘူး။
ထိုကဲ့သို့ပါဘဲ သူတို့ရဲ့ တနေ့တာ ဝတ်ဆင်ခဲ့ကြတဲ့ အဝတ်အစားတွေကို နေ့စဉ်လျှော်ဖွတ် မီးပူတိုက်ပြီးတာနဲ့ နေရာတကျ ထားပေးရတဲ့ လောင်ဒရီကို အပိုင်စားယူထားကာ ပျော်ရွှင်စွာနဲ့ တာဝန်ယူထားတဲ့ ဒိုဘီတယောက်ဆိုလဲ မမှားပြန်ပါဘူး။
တနေ့တာ နေ့စဉ်ပုံမှန်လုပ်နေကျ အလုပ်တွေက ပြစရာမရှိပေမဲ့ ရေချိုးခန်းနဲ့အိမ်သာကို နေ့စဉ်ဆေးရတဲ့ တာဝန်ကိုလဲ ဘယ်သူကမှ မခန့်အပ်ဘဲ ကိုယ်ကိုတိုင် အလိုက်တသိနဲ့ ခန့်အပ်ထားတဲ့ သန့်ရှင်းရေး အလုပ်တခုကလဲ ပါပါသေးတယ်။
နောက်တခါ တအိမ်လုံးနဲ့ တခြံလုံးရဲ့ သန့်ရှင်းရေးကို နေ့စဉ်မပြတ်လုပ်ရင်း ဆီးချိုရောဂါအတွက် ကိုယ်လက်တွေကို လှုပ်လှုပ်ရှားရှား သီးသန့်လုပ် မနေတော့ဘဲ တချက်ခုတ် နှစ်ချက်ပြတ် ဆိုသလိုပါဘဲ ကျန်းမာရေးကို ဂရုစိုက်တဲ့ အနေနဲ့ တာဝန်ခွဲဝေ ယူထားသူ အိမ်တော်ထိမ်း တယောက်လဲ ဖြစ်နေပါသေးပါတယ်။
သားကြီးကတော့ သိတတ်စ အရွယ်ထဲက မိဘဆွေမျိုးတွေရဲ့ အပြစ်ပြောစရာ မရှိအောင် ချီးကျူးခံရပြီး လိမ္မာသူလေး တယောက်ပါ ဘုရားတရား သံယာ မိဘ ဆရာသမားများ အလုပ်မှ အထက်အရာရှိများနဲ့ဆွေမျိုးများကို ရိုသေလေးစားပြီး မိသားစုများကို အင်မတန်မှ လေးစားချစ်ခင် တတ်သူတယောက် ဖြစ်ပါတယ်။
သူ့ရဲ့ တဦးထဲသော ညီမလေး ဖြစ်သူကိုလဲ အရမ်းချစ်ပြီး ညီမလေးကလဲ အကိုကြီး အဖအရာမှာ ထားပြီးလေးစား ချစ်ခင်ခြင်း ခံရတဲ့ အကိုကောင်း တယောက်ပါ။
မိဘတွေအတွက် ငယ်စဉ်ကသား ကြီးတော့အား ဆိုသလိုပါဘဲ မိဘက အားထားရသလို ဘာသာတရား ကိုင်းရှိုင်းပြီး ပရဟိတနဲ့ အလှူအတန်း လုပ်ရတာ ဝါသနာပါသူ တယောက်ပါ။
ငယ်စဉ်ထဲက သူ့အားသူကိုးတတ်တဲ့စိတ် ကြိုးစားချင်တဲ့ စိတ်တွေနဲ့ သူဝါသနာပါရာ အလုပ်တခုကို တစိုက်မတ်မတ် လုပ်ကိုင်ရင်း မိဘအပေါ် သိတတ်တဲ့ သားတယောက် ဖြစ်သလို တဦးတည်းသော ညီမလေးအပေါ်မှာလဲ စိတ်ဓါတ်ခွန်အား ပညာခွန်အား ငွေခွန်အားတွေနဲ့ တဖက်တလမ်းကနေ မိသားစုတာဝန်တွေကို ခွဲဝေထားပြီး ယူထားသူလဲ ဖြစ်ပါတယ်။
သမီးငယ်ကလဲ မိသားစုထဲမှာ မိဘနဲ့ အကိုအပေါ် သိတတ်ပြီး လိမ္မာသူလေး တယောက်ပါဘဲ အဖေ အမေနဲ့ အကိုတို့ကို အရမ်းချစ်ပြီး မိဘနဲ့ အကိုတို့အပေါ် စာနာစိတ် အပြည့်အဝ ထားတတ်သူလေးပါဘဲ။
တဦးထဲသော အကိုကိုယ် အရမ်းချစ်ပြီး သူလုပ်ချင်တာ ဖြစ်ချင်တာ မှန်သမျှကို ပညာချင်း ဖလှယ်လို့ရသော အရင်းနှီးဆုံးသော သူငယ်ချင်းလို အတွင်းကျကျ ပေါင်းသင်းလို့ရသော အကိုကိုယ် ဘာမဆို တိုင်ပင်ပြီးမှ အကိုယ့်ရဲ့ အကြံဥာဏ်အတိုင်း တသွေမတိမ်း လိုက်နာတတ်သူလေးပါ။
အိမ်မှာအငယ်ဆုံးပေမဲ့ မိဘက အမှန်တကယ် ပေးနိူင်တဲ့ စစ်မှန်တဲ့ ပညာအမွေတွေကို အခုထက်ထိ ယူလို့မကုန်နိူင်သေးသူ သူကိုယ်တိုင်က ပညာရေးနဲ့ ပါတ်သက်လာရင် အင်မတန်မှ လောဘကြီးပြီး စာကြိုးစားသူ အလှူအတန်း ဝါသနာပါသူ အဖက်ဖက်က စည်းကမ်းကြီးသူလေး တယောက်ပါ။
လက်ရှိမှာ ဆေးပညာနဲ့ သက်ဆိုင်တဲ့ဘွဲ့ တဘွဲ့ရပြီးသော်လဲ ပညာရေးမှာ လောဘရှိသူလေးမို့ တဘွဲ့နဲ့ မကျေနပ်နိူင်သေးဘဲ နောက်တဘွဲ့အတွက် ဆက်လက်ကျောင်းတက်နေဆဲမို့ သူကတော့ ပညာရေး လမ်းကြောင်းပေါ်မှာ ပညာရေးဆိုတဲ့ ကြောပိုးအိတ် တလုံးကိုလွယ်ရင်း အားသွန်ခွန်စိုက် လျှောက်လှမ်းနေတုန်းပါဘဲ။
နောက်ဆုံးမှာတော့ ကျမတို့ရဲ့ မိသားစု လေးယောက်ရဲ့အိမ်လေးဟာ ခြံစည်းရိုးက အစပြုပြီး အိမ်နောက်ဖေး စျေးဆိုင်တည်တာက အဆုံးသတ်လို့ သီရိဂေဟာလေး ဖြစ်ခဲ့ရကာ တယောက်နဲ့တယောက် ဆင့်ကဲ ဆင့်ကဲ တည်ဆောက်ခဲ့တဲ့ ချစ်ကြောက်ရိုသေဆိုတဲ့ ဆိုရိုးစကားလေးကြောင့် ဆိုရင်လဲ မှားမယ်မထင်ပါဘူးရှင်။
အားလုံးဘဲ ရွှင်လန်းချမ်းမြေ့ကြပြီး ကမ္ဘာပေါ်မှာ ရှိရှိသမျှသော လူသားအားလုံးအတွက် သီရိဂေယာလို့ဆိုတဲ့ ကျက်သရည် မင်္ဂလာအပေါင်းနဲ့ ပြည့်စုံပြီး စည်းလုံးညီညွတ်ကာ ခိုင်ခံ့တဲ့ အိမ်လေးတွေ တည်ဆောက်နိူင်ကြပါစေလို့ ဆန္ဒပြုလိုက်ရပါတယ်ရှင်။
Mar Mar Lwin
25/8/2018
Mittagong ,Australia
N S W