ဒီနေ့တော့ ထူးထူးခြားခြား မြန်မာပြည်မှာ ကျန်နေခဲ့တဲ့ ကြောင်လေးတွေကို သတိရနေမိတယ်
အဲဒီ ကြောင်လေးတွေ အကြောင်းတွေးမိရင် မျက်ရည်ကျရတာက များပါတယ်။
အိမ်ကို ဘယ်သူကမှ မခေါ်ဘဲနဲ့စပြီးရောက်တာက အိမ်လည်လာတဲ့ စကွီရယ်ပေါ့
စကွီဆိုတာက သမီးက ချစ်လွန်းလို့ ပေးထားတဲ့နံမည်လေး
သူအိမ်လည်ရောက်လာတော့ လမ်းလျှောက်တတ်ခါစအရွယ်
ဘယ်ကနေဘယ်လို မျက်စေ့လည်ပြီး လမ်းမှားလာလေတယ် မသိပါဘူး။
သူ့ကို စတွေ့တွေ့ခြင်း ချစ်လွန်းလို့ အစာကျွေးပြီး မွေးထားလိုက်မိတယ်
သူကြောင်လားမြောက်လာတဲ့ အချိန်မှာ ကလေးမွေးတယ်
စစမွေးတော့ လေးကောင်မွေးပါတယ်။
သူတို့ကို ကျမနံမည်ပေးလိုက်တယ် တစ်တစ် နှစ်နှစ် သုံးသုံး လေးလေး ဆိုပြီးတော့ပေါ့
သူတို့သားအမိတွေကို ကျမတို့အိပ်ယာနားမှာ မွေ့ယာ ခြင်ထောင်နဲ့ ထားပေးလိုက်တယ်
စကွီက အပြင်ထွက်ချင်ရင် ခြင်ထောင်မ မတတ်လို့ အသံပေးပြီး နိူးတတ်တယ်
သူအပြင်က ပြန်လာရင် တခါသူ့ကို ခြင်ထောင်မပေးပြီး ကလေးတွေနဲ့ ပြန်နေခိုင်းရတယ်။
ကလေးတွေ နဲနဲကြီးတော့ အပြင်ထွက်တတ်တဲ့ အရွယ်မှာ အကုန်ထွက်လာကြတယ်
အိမ်နဲ့ဆေးခန်း တွဲပြီးဖွင့်ထားတော့ လူစိမ်းလာရင် သူတို့ကြောက်ကြတယ်
တရက်တော့ စကွီက သူ့ကလေးတွေကို အိမ်နဲ့ဝေးရာခေါ်ပြီး ထွက်သွားတယ်
ကျမတို့ ချော့ပေမဲ့ သူအရမ်းစိတ်ဆိုးပြီး ပြန်အော်ကာ ကလေတွေကို ချီသွားတယ်။
တကောင်ပြီး တကောင်ချီပြီး ထွက်သွားခဲ့တယ်
သူတို့ ထွက်သွားထဲက ကျမတို့အိမ်မှာ ခြောက်ကပ်သွားခဲ့တယ်
လေးရက်လောက် အကြာမှာ သူအိမ်ကို ပြန်လာခဲ့တယ်
ကျမသူ့ကို ခလေးတွေ ပြန်ခေါ်လာခဲ့ဖို့ေ ချော့ပြီးပြောမိတယ်။
ကျမရဲ့ ပေါင်ပေါ်ကနေ သူလေးတွဲ့စွာနဲ့ ဖြေးဖြေးခြင်း ထွက်သွားခဲ့တယ်
သူမွေးတုံးက သူ့ကိုကြည့်ပြီး သနားလွန်းလို့ မျက်ရည်တွေတွေ ကျခဲ့ရတဲ့ကျမ
သူလေးတွဲ့စွာ ထွက်သွားတဲ့ နေ့မှာဘဲ ကျမထပ်ပြီး မျက်ရည်ကျခဲ့ရတယ်။
သိပ်မကြာခင် သူပြန်လာခဲ့တယ် သူ့ပါးစပ်ထဲမှာ လေးလေးကိုချီလာတယ်
နောက်တစ်ခါ သူထွက်သွားပြီး သုံးသုံးကိုချီပြီး ပြန်လာခဲ့တယ်
နောက်ဆုံးတခေါက် သူပြန်ထွက်သွားပြီး တစ်တစ်ကို ခေါ်လာခဲ့တယ်
ပြီးတော့ သူ့ကလေးတွေနားမှာ သူတုံးလုံး လှဲနေလိုက်တယ်။
ကျမသူ့ကို မေးမိတယ် နှစ်နှစ်ရော ဘယ်မှာလဲလို့ပေါ့
သူမျက်စေ့ကို မှိတ်ထားပြီး မသိသလို သူနေလိုက်တယ်
ကျမငိုတော့ သူမျက်စေ့ဖွင့်ကြည့်တယ်
ကျမအမျိုးသားက ပြောတယ်
နင်ငိုရင် သူပိုခံစားရလိမ့်မယ် မငိုပါနဲ့တဲ့။
ကျမသူတို့နဲ့ ဝေးတဲ့နေရာမှာ သွားပြီးငိုနေမိတယ်
အမျိုးသားက လေးလေးမှာ ပါလာတဲ့အနာကို ဆေးထဲ့ပြီး သန့်ရှင်းရေး လုပ်ပေးနေတယ်
သိပ်မကြာဘူး လေးလေး သေသွားခဲ့တယ်
ကျမတို့ သူ့ကိုမြေကြီးထဲမှာ မြှပ်ပြီးထားပေးလိုက်ခဲ့တယ်။
အဲဒီနေ့ကစပြီး စကွီလိမ္မာသွားခဲ့တယ်
ဘယ်ကိုမှ မသွားတော့ဘဲ ကျန်နေတဲ့ ကလေးတွေအတွက်သူ
အကောင်းဆုံး မိခင်ဖြစ်အောင် နေသွားခဲ့တယ်။
