ဇရာ ဇာတိ မရဏ

ကိုယ့်ကိုကိုယ် ငယ်ချင်ဟန် ဆောင်နေလို့လဲ မရတော့ဘူး အဲလိုပါဘဲ အသက်ကလဲ ညာလို့မရတော့ဘူးလေ မနက်က ချက်ပြုပ်ပြီးထဲက အိမ်သန့်ရှင်းရေး လုပ်လိုက်တာ နေ့လည် ၁၂နာရီထိုးတော့ ကတုန်ကရင်နဲ့ မောလာတယ် တဖြည်းဖြည်းနဲ့ ဇရာ ဇာတိ မရဏတွေက ပေါ်လာခဲ့တယ်။

ဒါပေမဲ့လဲ လက်သည်းနီလေး ခြေသည်းနီလေးဆိုး မျက်ခုံးမွှေးလေးနူတ်လို့ လိုချင်သလို ပုံလေးဖော်ကာ ကိုယ့်ကိုကိုယ် နုတယ်ထင်အောင် နီညိုရောင်လေးဆိုးပြီး ရွဲအိလာတဲ့ မျက်ခွံကြီးကို ငွေရောင် ခပ်ဖျော့ဖျော့တင်ကာ ခရမ်းနုအရောင်လေး ထပ်အုပ်ပြီး ဖုံးထားကာ မိတ်ကပ်လေးလိမ်း နူတ်ခမ်းနီလေးဆိုးကာ ဇရာဆိုတာကို ညာနေချင်သေးတာကလဲ လူ့သဘာဝပါဘဲ။

အဲဒီလိုတွေ ဖုံးဖိထားတော့ တချို့က ကျမအသက် ၅၃ဆိုတာ မယုံကြဘူး မထင်ပါဘူး မမရယ် မမအသက်က ၄၀ကျော်လောက်ဘဲ ရှိမှာပါဆိုပြီး b la b la b la b la လာပြောရင် အကျေနပ်ကြီး ကျေနပ်မိသူကလဲ ကျမပါဘဲ။

တချို့ကလဲ ၅၃ဆိုတာ သိတော့သိတယ် သူ့ခမျာ လှချင်လွန်းလို့ အရည်ရွဲနေတဲ့ မျက်နှာကြီးကို ဆေးဆိုးပန်းရိုက် လုပ်ထားရတာ သနားပါတယ်ဆိုပြီး မမအရမ်းလှတာဘဲလို့ ပြောလိုက်အုံးမှပါ ဆိုပြီးလာပြောတိုင်းလဲ ပီတိတွေ ပလပွနဲ့ ကျေနပ်နေတာက ကျမပါဘဲ။

ဆံပင်တွေ ဖွေးဖွေးဖြူဖြူကာ ကြာဇံတွေလို ဖြစ်နေတာကိုလဲ ညိုတိုတို မည်းတဲတဲလေးဖြစ်အောင် တလနှစ်ခါ ဆေးဆိုးပြီး ပလီမွှေး ပလီတောင် ဆံပင်လေးကို အိပ်ယာက နိုကးထဲက တသသနဲ့ လုပ်နေရတာလဲ ဘ၀ရဲ့ဒုက္ခ တခုပါဘဲ။

ကျိုးပဲ့နေတဲ့ သွားလေးတွေ မပေါ်အောင်လဲ ငယ်ငယ်ကလို ဝါးလုံးကွဲ မရယ်ရဲလေတော့ မိန်းမတို့ အိနြေ္ဒ ရွှေပေးလို့မရဆိုတာမျိုး ဖြစ်ရလေအောင် အတင်းကြီး ပါးစပ်ကိုစေ့ကာ ပြုံးပြုံးကြီးလုပ်ပြီး သကာလ ကျမက အမြဲတမ်း ပြုံးပြုံးလေးဘဲ နေတတ်တာဆိုပြီး ပြောရတာလဲ မောလှပါပြီ။

ဒီကြားထဲ ဆီးချိုရောဂါကြောင့် မျက်လုံးတွေက တနေ့ထက်တနေ့ ေ၀၀ါးလာလိုက်တာ တခါတလေများ ဆားနဲ့သကြား မှားထည့်မိတဲ့ဟင်းကို အလုပ်က မောမောနဲ့ပြန်လာတဲ့ အိမ်ဦးသခင်က အမားကြီးချက်တဲ့ဟင်းက ငံလိုက်တာလို့ ဆိုလိုက်တော့မှ မှားပြန်ပြီဆိုပြီး နှစ်ဖူးကို လက်ဝါးနဲ့ ဖတ်ခနည်း ရိုက်ရပြန်တာပါဘဲ။

အဲဒီလိုပါဘဲ နားကထိုင်း ခါးကကိုင်း ဒူးကနာ ဝေဒနာတွေက ဖိဆီးလိုက်တာများ ဖြစ်ပြီးရင်ပျက် ဖြစ်ပြီးရင်ပျက်နဲ့ ဖြစ်ပျက်နှစ်တန် ရှုမှတ်နေတဲ့ကြားက အပိုဆုတွေဖြစ်တဲ့ လောဘ ဒေါသ မောဟတွေကလည်း စက္ကန့်မလတ် ၀င်၀င်လာနေသေးတော့ကာ တရားတွေလဲ ကျရပြန်တာပါဘဲ။

ဒီကြားထဲ အိမ်ဦးသခင်က သူ့ဘာသာသူ မုန့်စားချင်လို့ ၀ယ်လာရင်လဲ အောင်မယ် ကြည့်စမ်း ငါလုပ်တဲ့မုန့်ကျတော့ အုန်းသီးပါလို့ ဂွေးသီးပါလို့ဆိုပြီး မစားဘဲ တိုလီမုတ်စတွေကျတော့ ၀ယ်စားတယ်ဆိုပြီး ဒေါသတွေကလဲ ထွက်ရသေးတာပါဘဲ။

အဲဒီလို လောဘတွေ ဒေါသတွေ များလာတော့ မောဟက အလိုလို ပါလာရော အဲဒီတော့ ဘာများဖြစ်မယ် တယ်ထင်သလဲ

အခုန အိမ်သန့်ရှင်းရေးလုပ်အပြီး ရေကူးမယ်ဆိုပြီး ရေကူးကန်ကိုသွားတာ အင်္ကျီလဲမယ်လုပ်ရော ဘောင်းဘီဘဲပါလာပြီး အင်္ကျီက မပါလာဘူး။

ရေမကူးဘဲ ပြန်လာရတော့ တလမ်းလုံး စဉ်းစားလာမိတယ် ဇရာဆိုတာကလဲ ညာလို့မရပါလား လောဘ ဒေါသ မောဟဆိုတာကလဲ ဘယ်အရာကမှ မကောင်းပါလား။

ရုပ်နဲ့နံသာရှိပြီး မာမာလွင်ဆိုတာလဲ မရှိပါလား ရုပ်နဲ့နံသာ ကွဲသွားခဲ့ရင် အရာရာကိုလဲ ထားခဲ့ရမှာပါဘဲ မာမာလွင်ဆိုတာလဲ ပျောက်သွားတော့မှာပါလားလို့ လမ်းတလျှောက်မှာ အတွေးသံသရာ လည်နေတာကိုဘဲ ငေးရင်း တွေးရင်းနဲ့ ရေကူးကန်ကနေ ပြန်လာလိုက်ရတော့တယ်။

ဒါပေမဲ့လဲ အိမ်ရောက်လို့ ရေမိုးချိုးပြီးပြန်တော့လဲ လောဘ ဒေါသ မောဟတွေနဲ့ ဖြစ်ပျက် ဖြစ်ပျက် ရှုဖြစ်ပြန်ပါတယ် အိရွဲကျနေတဲ့ မျက်နှာကြီးကို ဖီးပေးလိမ်းပေး ပြင်ဆင်ပေးနေမိပြန်ပါပြီရှင်။

ရယ်မောခြင်းများနှင့်သာ အဆုံးသတ်နိူင်ကြပါစေ။

မာမာလွင်

၂၀ရက် ၃လ ၂၀၁၇ခုနှစ်